Неколкумина повредени при повторните напади на израелската армија врз сирискиот град Сувејда

ИСТАНБУЛ (АА) – Неколку лица се повредени денес во Сувејда откако израелската армија продолжи со воздушни напади врз јужната сириска покраина, соопштија сириските медиуми, пренесува Анадолу.

Државната новинска агенција САНА јави дека израелските беспилотни летала извршиле напади врз покраината, при што биле повредени неколку лица, без да даде дополнителни детали.

Израелското воено радио ги потврди нападите, велејќи дека тие биле насочени кон арсеналот на сириската армија во областа.

Нападите се случија кратко откако израелскиот министер за одбрана Израел Кац се закани дека ќе продолжи да ги напаѓа сириските сили ако не се повлечат од покраината Сувејда, во која се случуваат безредија меѓу заедниците на Друзите и Бедуините.