Mohammad Sıo
16 Јули 2025•Ажурирај: 19 Јули 2025
ЕРУСАЛИМ/ИСТАНБУЛ (АА) - Израелските власти ѝ ги одзедоа на палестинската општина Хеброн административните овластувања над џамијата Ибрахими и му ги пренесоа на религиозниот совет на (еврејски) доселеници, според веста на дневниот весник „Израел Хајом“, пренесува Анадолу.
Опишувајќи го потегот како „историска и досега невидена промена“, весникот наведува дека израелската цивилна администрација го пренела овластувањето над светото место на религиозниот совет на населбата Кирјат Арба, крај Хеброн, на окупираниот Западен Брег.
Не се наведува обемот на пренесените овластувања, но се вели дека потегот има цел да ги олесни „структурните промени“ на местото.
Ова е прва голема промена во статусот на џамијата од препораките на Шагмарската комисија од 1994 година, која го подели пристапот, доделувајќи 63% од местото на еврејските верници и 37% на муслиманите.
Таа поделба следуваше по масакрот во 1994 година од страна на екстремистичкиот доселеник Барух Голдштајн, кој уби 29 палестински верници за време на утринската молитва.
Според весникот, Цивилната администрација долго време се обидува да спроведе структурни промени на локацијата, вклучително и реновирање на покривот и изградба над „Јакововиот двор“, кој го користат еврејските верници поголем дел од годината.
Нема официјална потврда од израелските власти ниту одговор од палестинската Влада за информациите.
Во соопштението објавено на 26 февруари палестинското Министерство за вакваф и религиозни работи повтори дека џамијата Ибрахими, позната и како Пештерата на патријарсите и Пештерата Махпела, е „ексклузивен исламски вакаф“ и ги осуди израелските напори да ја трансформираат џамијата во еврејска синагога.
Џамијата се наоѓа во старото градско јадро на Хеброн, во област под целосна израелска контрола каде што живеат околу 400 нелегални доселеници под заштита на околу 1.500 израелски војници.
