„Никој не е безбеден во Газа“, предупреди комесарот на УНРВА

ЊУЈОРК (АА) - Генералниот комесар на Агенцијата на Обединетите нации за помош и работа за палестинските бегалци на Блискиот Исток (УНРВА), Филип Лазарини, изјави дека Израел продолжува со нападите врз Појасот Газа и дека веќе нема безбедно место во областа, известува Анадолу.

Лазарини на социјалните мрежи остро го осуди нападот извршен од израелската армија утринава во регионот Ал-Маваси во Хан Јунис, за кој тврдеа дека е безбеден.

Потсетувајќи дека израелските напади врз Појасот Газа траат од 7 октомври 2023 година, Лазарини рече дека оттогаш нема безбедно место во регионот и никој повеќе не е безбеден.

Тој додаде дека многу луѓе се убиени и повредени во денешниот израелски напад во Ал-Маваси.

„Овој напад е уште еден потсетник дека не постои ниту хуманитарна зона, а камоли безбедна зона“, рече Лазарини.

Тој посочи дека секој ден без прекин на огнот ќе предизвикува нови трагедии во Газа.

Израелската армија изврши воздушен напад врз шаторите на Палестинците кои беа насилно раселени во регионот Ал-Маваси, притоа убивајќи 11 лица, меѓу кои најмалку три деца, а 15 лица се повредени.

Израелската војска од 7 октомври 2023 година води геноцидна војна во Појасот Газа, притоа убивајќи повеќе од 45.580 Палестинци, главно жени и деца, и покрај резолуцијата на Советот за безбедност на Обединетите нации која повикува на итен прекин на огнот.

Во ноември, Меѓународниот кривичен суд во Хаг издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата поради војната во Газа.