Lina Altawell
09 Февруари 2026•Ажурирај: 10 Февруари 2026
ИСТАНБУЛ (АА) - Палестинскиот потпретседател Хусеин ал-Шеик рече дека израелските одлуки за окупираниот Западен Брег претставуваат „поништување на сите потпишани и обврзувачки договори“ и ризикуваат ескалација на тензиите низ целиот регион, јавува Анадолу.
„Она што е пуштено да циркулира за претстојните израелски одлуки за продлабочување на анексијата и наметнување нова реалност на Западниот Брег, вклучително и во Зоната А, претставува поништување на сите потпишани и обврзувачки договори меѓу страните и претставува опасна ескалација и очигледно кршење на меѓународното право“, напиша Ал-Шеик доцна синоќа на американската компанија за социјални медиуми X.
„Овие еднострани мерки имаат цел да го поткопаат секој политички хоризонт, да го отфрлат дводржавното решение и да го вовлечат регионот во натамошни тензии и нестабилност“, додаде тој.
Ал-Шеик ги повика американската администрација и меѓународната заедница веднаш да интервенираат за да ја запрат „агресијата поттикната од окупација“.
Претходно вчера израелскиот Кабинет за безбедност одобри мерки што ја менуваат правната и граѓанската рамка на окупираниот Западен Брег со цел зајакнување на израелската контрола.
Израелскиот јавен сервис КАН објави дека одлуките вклучуваат укинување на законот со кој се забрануваше продажба на палестинско земјиште на Евреи на Западниот Брег, откривање на евиденцијата за сопственост на земјиштата и пренесување на овластувањето за градежни дозволи во блокот на населби во Хеброн од палестинската општина на израелската цивилна администрација.
Мерките, исто така, ги прошируваат израелскиот надзор и дејствување во областите класифицирани како Зона А и Зона Б, наведувајќи наводни прекршувања поврзани со нелиценцирана градба, проблеми со водата и оштетување на археолошки и еколошки локалитети. Со проширувањето би се дозволило уривање и запленување на палестински имот дури и во области што цивилно и безбедносно се администрирани од Палестинската управа.
Според Договорот од Осло II од 1995 година, Зоната А е под целосна палестинска цивилна и безбедносна контрола, Зоната Б е под палестинска цивилна контрола со израелска безбедносна контрола, а Зоната Ц останува под целосна израелска контрола, што сочинува околу 60% од Западниот Брег.
Израелскиот весник „Једиот Ахронот“ објави дека одлуките на Кабинетот вклучуваат пренесување на надлежностите за планирање и изградба на џамијата Ибрахими и нејзината околина, како и на други верски објекти, од Општината Хеброн на израелската цивилна администрација, спротивно на договорите според Хебронскиот протокол од 1997 година меѓу Израел и ПЛО.
Израелските власти продолжија со уривање на палестинските домови и објекти низ Западниот Брег поради наводен недостиг на дозволи, што Палестинците го опишуваат како рестриктивни политики што го отежнуваат добивањето одобренија за градење.
Според Комисијата против колонизацијата и Sидот, палестинска владина агенција, Израел извршил 538 уривања во 2025 година, со што се зафатени околу 1.400 домови и објекти, што е голем пораст во споредба со претходните години.
Обединетите нации велат дека израелските населби на окупираната палестинска територија се нелегални според меѓународното право и ја поткопуваат одржливоста на дводржавното решение и со децении повикуваат на прекин на активностите за населување.
