Русија соопшти дека соборила рекордни 1.671 украински дрон за 24 часа

Руското Министерство за одбрана денес соопшти дека неговите системи за противвоздушна одбрана собориле 1.671 украински дрон во текот на изминатите 24 часа, што е рекорден број на пресретнувања, јавува Анадолу.

Москва соопшти дека претходниот рекорд е поставен во неделата, кога тврдеше дека пресретнале 1.478 дрона.

„Системите за противвоздушна одбрана соборија... 1.671 дрон со фиксни крила“, соопшти Министерството.

Министерството, исто така, тврди дека руските сили ги освоиле населените места Красноподилја и Орихуватка во Донецката Област и нападнале логистички центри, инфраструктура за гориво, енергија и транспорт што ја користат украинските сили.

Се наведува дека нападите, исто така, биле насочени кон објекти за склопување дронови, места за нивно складирање и нивни компоненти, како и места за привремено распоредување на украински војници и странски персонал на 148 локации.

Одделно, Министерството соопшти дека синоќа руските јуришни дронови погодиле резервоари за гориво во пристаништето Одеса, тврдејќи дека горивото било наменето за украинските сили.

Од украинските власти досега нема коментар за тврдењата на Русија, а независната верификација на тврдењата е тешка поради тековната војна.