Трамп објави видео со вештачка интелигенција за уништување нa иранскиoт остров Харг

ИСТАНБУЛ (АА) – Американскиот претседател Доналд Трамп доцна синоќа сподели видео генерирано со вештачка интелигенција на кое е прикажано уништување на иранскиот остров Харг, велејќи дека стратегиски важниот нафтен центар е „разнесен на парчиња“, јавува Анадолу.

„Островот Харг разнесен на парчиња!!! Претседателот ДЈТ“, напиша Трамп на својата платформа Трут соушал.

Претходно вчера американските сили нападнаа два ирански лансера на друг остров, Ларак, што претставуваше прв американски напад врз иранска територија од крајот на јули, изјави американски претставник за „Аксиос“.

Во операцијата биле нападнати системи за кои се тврди дека биле подготвувани за лансирање ракети со поморски мини кон Ормускиот Теснец.

Иранската исламска револуционерна гарда (ИРГЦ) соопшти дека во нападот биле убиени или повредени неколку борци и цивили и вети дека ќе возврати.

Иранската новинска агенција „Тасним“ објави дека прелиминарните информации укажуваат дека нападот бил извршен со беспилотни летала.

Островот Харг, клучен центар за иранската нафтена индустрија и извозот на нафта, не бил активен од 31 јули, според компанијата за следење бродови „Кплер“ и консултантската фирма „Енерџи аспектс“.

Сателитските снимки покажале дека сите три товарни пристаништа на Харг подолг период биле празни, според компанијата за поморско разузнавање „Виндворд“.

Островот вообичаено е одговорен за речиси 90 отсто од извозот на иранска сурова нафта, благодарение на пристапот до длабоки води погодни за големи нафтени танкери.

Тензиите меѓу Техеран и Вашингтон остануваат високи откако војната започна со напади врз Иран кон крајот на февруари.

Иако во јуни беше постигнат рамковен договор со посредство на Пакистан и Катар, САД повторно воведоа поморска блокада на иранските пристаништа на средината на јули откако пропадна привремениот договор со посредство на Пакистан за повторно отворање на Ормускиот Теснец.