Холандија бара ЕУ да подготви „статут за блокирање“ за заштита на МКС од нови американски санкции
- „Ќе направиме сè што можеме“ за да го заштитиме МКС, вели Том Берендсен
Холандија побара од Европската комисија да подготви „статут за блокирање“ за заштита на Меѓународниот кривичен суд (МКС) од можни нови американски санкции, изјави денес министерот за надворешни работи, јавува Анадолу.
Во интервјуто за холандскиот дневен весник „Де Волкскрант“, дадено на маргините на Генералното собрание на ОН во Њујорк, Том Берендсен изрази загриженост поради континуираниот притисок врз МКС и претставниците на судот.
Тој рече дека се можни нови санкции.
„Се подготвуваме за сè.“
„Во рамките на Европската Унија стоиме цврсто заедно, но надвор од неа има поединечни земји што сметаат дека САД го зголемуваат притисокот и дека не може едноставно да го игнорираат тоа“, рече Берендсен.
Неговите изјави следуваа откако „Волстрит џурнал“ во неделата објави дека администрацијата на американскиот претседател Доналд Трамп се подготвува да воведе широки економски санкции за Судот.
Наведувајќи дека САД никогаш не го поддржувале Судот, Берендсен додаде дека сега постои „масовно“ заострување на ставовите, што би можело да го оневозможи функционирањето на институцијата.
„Ќе направиме сè што може за да го заштитиме Судот“, истакна тој.
Берендсен додаде: „Холандија побара од Европската комисија да го подготви статутот за да може да ја примениме таа крајна мерка. Подготвени сме да го искористиме.“
- Што претставува статут за блокирање?
Статутот за блокирање е правен механизам наменет за заштита на компаниите и физичките лица од ЕУ од екстратериторијалната примена на одредени закони на трети земји, пред сè, секундарните санкции наметнати од САД.
„Статутот за блокирање е последната мерка што ја имаме. Сè додека можеме да го заштитиме МКС на други начини, ќе го правиме тоа“, рече тој.
Берендсен истакна дека таквата крајна мерка не треба да се користи само за праќање порака бидејќи тоа би можело да доведе до ситуацијата „дополнително да ескалира“.
Минатиот месец САД воведоа санкции за претседателката на МКС, Томоко Акане и високиот обвинител Абдулаје Сеје, потег што предизвика реакции во европските земји, меѓу кои Велика Британија, Франција и Германија, како и од претседателите на Европскиот совет и Европската комисија.
Мерките се дел од санкциите за МКС што американскиот претседател Доналд Трамп ги воведе во февруари 2025 година.
МКС соопшти дека девет од неговите 18 судии, двајцата заменици-обвинители, неговиот поранешен обвинител и еден член на персоналот во моментов се под американски санкции.
