Холандија го забележа најтоплото лето досега 


Холандија забележа најтопло лето откако се започнати мерењата во 1901 година, според податоците на Кралскиот холандски метеоролошки институт, објавија денес локалните медиуми, пренесува Анадолу.

Просечната температура во изминатите три месеци на главната станица на Институтот во Де Билт достигнала 19,3 Целзиусови степени, објави холандскиот јавен радиодифузер НОС.

Оваа вредност го надмина претходниот рекорд од 18,9 Целзиусови степени, регистриран во 2018 година.

Летото е обележано со повторливи топлотни бранови, исклучително топли ноќи и продолжена суша, според наводите.

Институтот, познат како КНМИ, во јуни првпат издал црвено предупредување поради екстремни горештини.

„Имавме најголем број денови со температури над 35 степени, бројот на тропски денови е поголем од кога било, а никогаш досега немавме толку многу последователни денови со ноќни температури од 22 степени или повисоки“, изјави експертот за клима на КНМИ, Петер Зигмунд.

Јужните делови на земјата биле особено погодени од екстремни ноќни горештини, објави НОС.

Во Мастрихт, температурите првпат откако се водат мерења останале над 22 Целзиусови степени во текот на три последователни ноќи.

„Во сценарио со високи емисии вакво лето во однос на температурата ќе биде просечно лето околу 2050 година“, рече Зигмунд.

Според пресметките на Зигмунд, лето со температури слични на оние што се регистрирани годинава, во сегашните климатски услови би можело да се појавува еднаш на секои пет години.

Тој предупреди дека со продолжувањето на глобалното затоплување се очекува ваквите услови да станат уште почести.

Зигмунд рече дека ефикасните климатски политики сè уште би можеле значително да влијаат врз долгорочниот пораст на температурите.

До 2050 година разликата меѓу сценаријата на КНМИ за високи и ниски емисии би можела да изнесува околу еден Целзиусов степен, а до крајот на векот да достигне четири степени, додаде тој.