Muhammed Sabry
20 Декември 2023•Ажурирај: 21 Декември 2023
АНКАРА (АА) - Поради израелските напади врз Појасот Газа раселени се повеќе од 90 отсто од населението на територијата, соопшти денес палестинската агенција на ОН за бегалци, јавува Анадолу.
„Над 60 отсто од инфраструктурата во Газа е уништена или оштетена“, се вели во соопштението на Агенцијата за помош и работа на Обединетите нации за палестинските бегалци на Блискиот Исток (УНРВА).
„Ова е запрепастувачко и невидено ниво на уништување и принудно раселување, кое се случува пред нашите очи“, се додава во соопштението.
- Израелски напади на Појасот Газа
Израел започна немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7 октомври.
На 24 ноември, во 07:00 часот по локално време, стапи на сила четиридневната хуманитарна пауза договорена меѓу Хамас и Израел, која потоа беше продолжена за уште три дена.
На 1 декември (петок), по завршувањето на хуманитарната пауза, израелската војска продолжи со своите интензивни напади низ Појасот Газа.
Од почетокот на израелските напади на Појасот Газа на 7 октомври досега се убиени над 19.667 Палестинци, а ранети се повеќе од 52.586 лица, објавија здравствените власти на палестинската енклава.
Во заробеништво сѐ уште се наоѓаат 130 Израелци. Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.
