Албанија: Пензионерите протестираат за зголемување на пензиите и подобрување на услугите

ТИРАНА (АА) - Десетици пензионери протестираа денес во Тирана, со барања за зголемување на пензиите и подобрување на услугите што им ги обезбедуваат институциите, јавува Анадолу.

Протестот беше организиран пред Пленарната сала на албанското Собрание, за време на парламентарната седница.

Со транспаренти со натписи како „Достоинствени пензии“, „Трошоците за живот се зголемуваат, достоинството се намалува“, „Одобрете го животниот минимум“, „Намалете ги трошоците за живот“ и други, пензионерите побараа да се почитуваат нивните права.

Протестот го поддржаа и граѓани, рудари и поранешни рудари.

Група рудари, исто така, протестираа барајќи одобрување на нивниот правен статус од страна на албанскиот Парламент.

Во последната година, пензионерите во Албанија организираа неколку протести, барајќи зголемување на пензиите за различни категории и подобрување на социјалните услуги за нив.