Британски турист исчезнал по пад од крузер кај Канарските Острови

ЛОНДОН (AA) – Возрасен британски турист исчезнал по пад од крузер во близина на островот Тенерифе, најголемиот од шпанските Канарски Острови, јавија медиумите денес, јавува Анадолу.

Шпанските спасувачки тимови водеа интензивна потрага по 76-годишниот маж, кој бил пријавен како исчезнат вчера изутрина од крузерот „Марела експлорер 2“.

Во соопштение пренесено од британските медиуми, компанијата „Марела крузери“ го потврди инцидентот, кој се случил додека бродот пловел кон островот Ла Гомера, еден од Канарските Острови, лоцирани околу 100 километри од северозападниот брег на Африка.

„Нашиот посветен тим за нега го поддржува семејството, обезбедувајќи помош и утеха. Тесно соработуваме со локалните власти и ќе продолжиме да нудиме секаква можна поддршка“, се вели во соопштението.

Според извештаите, во напорите за пронаоѓање на исчезнатиот турист учествуваат и хеликоптери и патролен брод.

Шпанската островска група примила околу 14,1 милион странски туристи во 2023 година, вклучувајќи околу 5,7 милиони британски државјани, според операторот на аеродромот „Аена“.