Бројот на убиени во Газа надмина 37.700, од кои 60 Израел ги уби во последните 24 часа

АНКАРА (АА) - Уште најмалку 60 Палестинци се убиени во израелските напади врз Појасот Газа, со што вкупниот број на убиени се искачи на 37.718 од минатиот 7 октомври, соопшти денес Министерството за здравство во опколената енклава, јавува Анадолу.

Во соопштението на Министерството се додава дека околу 86.377 лица се повредени во нападот.

„Израелските сили убија 60 луѓе и повредија 140 во четири 'масакри' врз семејства во последните 24 часа“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да стигнат до нив“, се додава.

Непочитувајќи ја Резолуцијата на Советот за безбедност на ОН со која се бара итен прекин на огнот, Израел се соочи со меѓународна осуда поради континуираната брутална офанзива врз Газа од нападот на палестинската група Хамас на 7 октомври 2023 година.

Во текот на осум месеци од израелската војна огромни делови од Газа се во урнатини, а постои исклучителна блокада за храна, чиста вода и лекови.

Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од еден милион раселени Палестинци побараа засолниште.