Ватсап ја надмина бројката од 3 милијарди корисници месечно

ИСТАНБУЛ (АА) – Апликацијата за пораки на Мета, Ватсап, сега има повеќе од 3 милијарди активни корисници месечно, соопшти извршниот директор на компанијата, Марк Закерберг, за време на презентацијата на финансиските резултати за првиот квартал во средата, јавува Анадолу.

По достигнувањето на 2 милијарди корисници во 2020 година, Ватсап стана една од ретките апликации – заедно со Фејсбук – кои ја имаат надминато оваа импресивна бројка.

Со својата огромна база на корисници, Ватсап претставува клучен бизнис за Мета, особено сега кога компанијата се фокусира на развојот на вештачката интелигенција.

Според компанијата, апликацијата е еден од нејзините најголеми канали за дистрибуција на услуги базирани на вештачка интелигенција.

„Гледаме дека луѓето се вклучуваат со Мета АИ преку повеќе различни влезни точки. Ватсап продолжува да има најсилна употреба на Мета АИ од сите наши апликации“, изјави директорката за финансии на Мета, Сузан Ли, за време на конференцискиот повик.

Закерберг додаде дека иако Ватсап овозможува лесен пристап до можностите на вештачката интелигенција, компанијата морала да примени поинаков пристап на пазарот во САД, каде што корисниците и натаму претпочитаат класични пораки преку стандардните апликации на мобилните телефони.

„Се надеваме дека со тек на време ќе станеме лидери на пазарот на пораки во САД, но таму сме во поинаква позиција отколку во остатокот од светот кога станува збор за Ватсап“, рече тој.

„Затоа сметаме дека апликацијата Мета АИ како самостоен производ ќе биде особено важна за САД, со цел да се воспостави лидерска позиција како главен личен АИ што луѓето го користат. Но, ќе продолжиме да ги унапредуваме сите искуства на повеќе нивоа“, додаде тој.

Од Мета исто така информираа дека Ватсап бизнис – комерцијалната платформа на апликацијата – бележи значителен раст и има важен удел во приходот од 510 милиони долари што го оствари неговото семејството на апликации.