Gülşen Topçu
02 Септември 2026•Ажурирано: 02 Септември 2026
Палестинскиот ткајач Хусам ес-Саваф повторно седна на разбојот во Газа, каде што нема електрична енергија, за да ја задоволи потребата од килими на жителите на Газа кои, откако ги загубија своите домови поради израелските напади, се принудени да живеат во шатори.
Нападите на Израел врз Појасот Газа, кои траат од октомври 2023 година, во голема мера ги уништија местата за живеење во регионот, а и покрај прекинот на огнот постигнат пред околу една година, нападите и тешките услови за живот продолжуваат.
Палестинците, кои порано користеле теписи во своите домови, последниве години се принудени во шаторите во кои мора да живеат да користат полесни и неопходни подни прекривки, како килими, кои може да се носат во услови на принудно „раселување“, наместо теписи.
- Нема електрична енергија, производството се одвива на традиционален начин -
Палестинскиот ткајач Саваф повторно ја активирал својата мала работилница во областа Шаагаф, во источниот дел на градот Газа, за да ја задоволи оваа потреба.
Меѓутоа, поради недостигот од електрична енергија во Газа, Саваф е принуден да користи традиционални методи во секоја фаза од производството, па конците што ќе се користат за килимите ги намотува со рачен чекрек, а килимите рачно ги ткае на традиционални разбои.
- Со семејниот занает ги задоволува потребите на луѓето и обезбедува егзистенција -
Саваф за Анадолу раскажа дека неговото семејство се занимава со ткаење како семеен занает околу 300-400 години и произведува теписи и килими, но истакна дека прекинале со занаетот кога почнале израелските напади.
Тој рече дека одлучил да се врати на ткаењето откако видел дека луѓето имаат тешкотии да најдат килими и рогозини за подовите, а истакна дека особено голем интерес за килимите покажуваат луѓето што живеат во шатори.
Саваф истакна дека со повторното седнување на разбојот се обидува да задоволи една од основните потреби на луѓето, но и да обезбеди егзистенција за себе и за неколкумина што работат со него.
- Производството продолжува и покрај недостигот од суровини -
Саваф истакна дека во текот на производството се соочуваат со сериозен недостиг од суровини.
„Имаме тешкотии да најдеме суровини. За време на војната нашите фабрики претрпеа големи разурнувања. Имав повеќе магацини. Некои од нив изгореа до темел. Уништени се 80-85 отсто од конците“, рече тој.
Раскажувајќи дека производството го продолжуваат со преостанатите конци и машини, Саваф рече дека побарувачката за нивните производи се зголемила поради недостигот од теписи на пазарот и фактот дека килимите се поевтини од теписите.
- „Бидејќи нема електрична енергија, користиме рачен чекрек за намотување на конците“ -
Саваф рече дека прекините во снабдувањето со електрична енергија во Газа го отежнуваат и производството и истакна дека поради тоа се принудени да користат традиционални методи во секоја фаза од ткаењето.
„Бидејќи нема електрична енергија, моравме да користиме рачен чекрек за намотување на конците. Што да правиме, светот се врти, животот продолжува“, рече Саваф, додавајќи дека и покрај тоа што се наоѓаат многу блиску до Жолтата линија, која е под израелска окупација во Газа, ќе продолжи да прави сè што може за да го одржи семејниот занает.
