Во експлозија пред суд во Исламабад загинаа 12 лица и 27 се повредeни

ИСЛАМАБАД / КАРАЧИ (АА) - Најмалку 12 лица загинаа, а 27 се повредени во денешната експлозија пред комплексот на судот во главниот град на Пакистан, Исламабад, потврди пакистанскиот министер за внатрешни работи Мохсин Накви, јавува Анадолу.

Експлозијата се случила на паркингот на комплексот на судот.

„Бомбашот самоубиец се насочил кон полициското возило бидејќи не можел да влезе во комплексот“, изјави Накви за новинарите на местото на експлозијата.

Тој додаде дека се преземаат мерки за идентификување на напаѓачот.

Претседателот Асиф Зардари го осуди нападот, велејќи дека мора да бидат елиминирани „странски спонзорираните“ терористи што дејствуваат во Пакистан.

Безбедносни извори за Анадолу изјавија дека телата на 12 жртви се пренесени во локалната болница, а повредените се хоспитализирани за итен третман.

Полицијата и итните служби веднаш го обезбедиле подрачјето и започнале истрага.

Одделно, безбедносните сили спроведуваат операција против тројца вооружени што се кријат во зградата на колеџот „Вана Кадет“ во Северозападен Пакистан, соопштија безбедносни извори.

Според овие извори, околу 500 кадети се сместени во студентскиот дом, кој не е дел од зградата во која се засолниле напаѓачите, во областа Јужен Вазиристан.

Накви рече дека досега во операцијата се убиени тројца припадници на безбедносните сили.