Во израелските воздушни напади врз Газа се убиени неколку Палестинци
- Очевидци известија дека воени авиони го гаѓале домот на семејството Абу Рида во градот Абасан ал-Кабира, источно од градот Хан Јунис, при што има загинати и повредени.
![Во израелските воздушни напади врз Газа се убиени неколку Палестинци](https://cdnuploads.aa.com.tr/uploads/Contents/2024/08/26/thumbs_b_c_1ef5aa0b774c19cce019a6975923f3cd.jpg?v=110335)
ГАЗА (АА) - Неколку Палестинци беа убиени и повредени вчера откако израелски воени авиони бомбардираа два дома во градот Газа и Хан Јунис во Појасот Газа, јавува Анадолу.
Очевидци известија дека воени авиони го гаѓале домот на семејството Абу Рида во градот Абасан ал-Кабира, источно од градот Хан Јунис, при што има загинати и повредени. Медицински екипи и тимови за цивилна одбрана ги пренеле жртвите во Европската болница во Газа.
„Израелските окупатори бомбардираа два дома, едниот во градот Газа, а другиот на семејството Абу Рида во Абасан ал-Кабира, Хан Јунис“, соопшти Цивилната одбрана преку платформата Телеграм.
Сè уште не е потврден бројот на жртвите во нападите.
Според локалните здравствени власти, во израелските напади се убиени повеќе од 40.400 Палестинци, главно жени и деца и над 93.000 се повредени.
Поради тековната блокада на Газа постои сериозен недостиг на храна, чиста вода и лекови, а голем дел од регионот е во урнатини.
Израел е обвинет за геноцид пред Меѓународниот суд на правдата, кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнениот напад врз градот на 6 мај.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.