Германија побара од Израел да дозволи влез на поголема хуманитарна помош во Газа

БЕРЛИН (АА) – Германија денес повторно побара од Израел да дозволи влез на поголема хуманитарна помош за Појасот Газа, предупредувајќи на зголемен број цивилни жртви, јавува Анадолу

„Со обновената ескалација во Појасот Газа, се соочуваме со ситуација што ја гледаме со голема загриженост, а бројот на цивилни жртви е едноставно превисок. Ова едноставно не смее да продолжи“, изјави заменик-портпаролката на германската Влада, Кристијане Хофман, на прес-конференција во Берлин.

Таа додаде дека мора да се достави поголема хуманитарна помош во Газа и дека прекинот на огнот мора да биде повторно воспоставен.

Израелската армија започна нов бран воздушни напади врз Газа на 18 март, убивајќи повеќе од 920 Палестинци, и ранувајќи над 2.000, со што го прекрши договорот за прекин на огнот и размена на заробеници.

Континуираното затворање на граничните премини во Газа од страна на Израел ја турка палестинската енклава до „невидена хуманитарна катастрофа“, предупредија локалните власти минатата недела.

Според договорот за прекин на огнот, Израел требаше да дозволи влез на 600 камиони со хуманитарна помош и 50 камиони со гориво во Газа дневно. Сепак, од почетокот на март, израелската Влада блокираше влез на 15.000 камиони со помош и 1.250 камиони со гориво, соопшти медиумската канцеларија на Владата во Газа.

„На Газа ѝ се заканува хуманитарна катастрофа", предупредија властите.

Овие залихи се сметаат за есенцијални средства за преживување на населението во Газа, кое е доведено до екстремна сиромаштија како последица на продолжената израелска офанзива, според податоците на Светската банка.

Од октомври 2023 година, над 50.350 Палестинци – главно жени и деца – се убиени, а над 114.400 се повредени во израелските напади.

Меѓународниот кривичен суд во ноември минатата година издаде налози за апсење на израелскиот премиер Бенјамин Нетанјаху и неговиот поранешен министер за одбрана, Јоав Галант, поради воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради војната во енклавата.