ИСТАНБУЛ (АА) - Децата се едни од најтаргетираните жртви на израелската агресија, со над 17.000 деца убиени во Газа од октомври 2023 година, соопшти денес палестинското Министерство за образование, јавува Анадолу.

Министерството во соопштението за медиумите по повод Денот на палестинските деца, кој се одбележува секоја година на 5 април, рече дека „образованието во Палестина, особено во Газа, е под директен напад на израелската окупација, која продолжува да ги уништува училиштата и да го спречува пристапот на децата до безбедни образовни средини“.

Се нагласува дека учениците во Газа, Кудс (Ерусалим) и областите класифицирани како „Област Ц“ на окупираниот Западен Брег се соочуваат со секојдневни предизвици поради тековната војна.

„Над 17.000 деца се убиени во Газа, бројка што ја отсликува длабочината на трагедијата што децата ја трпат, секоја бројка претставува живот, спомени и изгубени искуства“, соопшти Министерството.

И покрај овие тешки услови, Министерството ја истакна издржливоста на децата од Газа, кои продолжуваат да се држат до своето право на образование, кое го гледаат како единствен пат кон подобра иднина.

Министерството промовира виртуелни училишта и алтернативни мерки за да се осигура дека образованието продолжува и покрај предизвиците.

Од почетокот на тековната израелска офанзива во Газа на 7 октомври 2023 година, палестинските деца се подложени на катастрофални услови, а владините извештаи покажуваат дека жените и децата сега сочинуваат над 60 отсто од жртвите, чиј број сега достигна над 50.000.

Децата под 18-годишна возраст сочинуваат 43 отсто од населението на Палестина, 3,4 милиони на Западниот Брег и 2,1 милиони во Газа, според Палестинското Централно биро за статистика.