Деца меѓу најмалку 30 убиени Палестинци во израелските напади врз баратели на помош, домови и шатори

ГАЗА/ИСТАНБУЛ (АА) – Во нападите на израелската Армија од раните утрински часови загинаа најмалку 30 цивили, меѓу кои и деца, соопштија медицински извори, јавува Анадолу.

Медицински извори за Анадолу изјавија дека пет члена на едно семејство се убиени во израелски напад врз шатор во кој се сместени раселени Палестинци во бегалскиот камп Шати во западниот дел на градот Газа.

Четворица Палестинци, меѓу кои и деца, се убиени во друг напад врз шатор во близина на Исламскиот универзитет на Газа во истиот град.

Израелската Армија гранатираше куќа во јужната населба Сабра, при што убиени се две деца, а други се повредени.

Уште четворица Палестинци од истото семејство ги загубија животите, а повеќемина се повредени откако израелската Армија погоди зграда во која се сместени раселени лица во населбата Зејтун, во градот Газа. Нападот, исто така, предизвика пожар во зградата.

Во централниот дел на Појасот Газа, осум Палестинци се убиени од израелски оган во близина на пункт за дистрибуција на хуманитарна помош во северниот бегалски камп Нусејрат, според соопштението на болницата Ал-Авда.

Уште пет лица, меѓу кои едно дете, се убиени, а повеќемина се повредени кога израелските воени авиони гаѓаа неколку куќи во бегалскиот камп.

Палестинка и нејзините две деца, од кои едно бебе, се убиени во израелски напад врз нивната куќа во бегалскиот камп во Кан Јунис.

Израелски авиони гаѓаа шатор во Ал-Маваси, во Кан Јунис, при што се повредени 12 лица.

Израел уби повеќе од 62.000 Палестинци во Газа од октомври 2023 година. Воената кампања ја опустоши енклавата, која се соочува со глад.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.