Европа се соочува со зголемена закана од болести преносливи преку комарци

ЛОНДОН (АА) – Европа се соочува со подолги и поинтензивни сезони на пренос на болести предизвикани од комарци, вклучително и вирусот Западен Нил и чикунгуња, соопшти Европскиот центар за превенција и контрола на болести (ECDC), јавува Анадолу.

Според здравствените експерти, оваа промена е поттикната од климатските и еколошките фактори, како што се зголемените температури, подолгите лета, поблагите зими и промените во врнежите – услови што овозможуваат комарците да се размножуваат и да шират вируси.

„Европа влегува во нова фаза во која подолг, поширок и поинтензивен пренос на болести преносливи преку комарци станува новата нормалност. ECDC тесно соработува со сите земји членки за да обезбеди соодветна поддршка и навремени насоки за јавното здравство, со цел зајакнување на европскиот одговор“, изјави денес директорката на ECDC, Памела Ренди-Вагнер.

Заклучно со 13 август 2025 година, осум европски земји пријавиле 335 локално стекнати случаи на инфекција со вирусот Западен Нил кај луѓе и 19 смртни случаи. Најпогодена е Италија со 274 потврдени случаи.

Грција има пријавено 35 случаи, потоа Србија (9), Франција (7), Романија (6), Унгарија (2), Бугарија (1) и Шпанија (1).

Франција потврдила и 111 случаи на вирусната болест чикунгуња, а Италија седум. Епидемиите најмногу ги зафатиле јужните и југоисточните региони.

Иако на европска територија не се пријавени смртни случаи од чикунгуња, глобално годинава се регистрирани повеќе од 240.000 случаи и 90 смртни случаи.

Случаи на вирусот Западен Нил и понатаму се појавуваат низ Европа.

Првпат се пријавени инфекции во италијанските области Латина и Фрозиноне, како и во округот Салаж во Романија. Европа моментно се соочува со најголем број случаи на вирусот Западен Нил во последните три години, при што врв на инфекциите се очекува кон крајот на август или септември.

За да им помогне на земјите да одговорат, ECDC објави нови насоки за надзор, превенција и контрола на чикунгуња, денга и вирусот Зика, како и посебен прирачник за вирусот Западен Нил. Препораките се наменети за здравствените власти, вклучително и во земји со ограничено искуство со вакви епидемии.

„Како што се менува епидемиолошката слика на болестите преносливи преку комарци, во иднина сè повеќе луѓе во Европа ќе бидат изложени на ризик. Ова ја прави превенцијата поважна од кога било – преку координирана акција на јавното здравство и преку лични заштитни мерки. Постојана е итната потреба од зајакнување и проширување на ефикасни и еколошки прифатливи интервенции за контрола на комарците“, изјави д-р Селин Госнeр, раководител на одделот за болести преносливи преку храна, вода, вектори и зоонози при ECDC.