Necva Taştan Sevinç
09 Март 2026•Ажурирај: 10 Март 2026
ИСТАНБУЛ (АА) – Пролонгираниот конфликт на Блискиот Исток би предизвикал далекусежни последици, не само за регионот, туку и за Европа и пошироко, изјави шефицата на европската дипломатија, Каја Калас, јавува Анадолу.
Говорејќи на Амбасадорската конференција на Европската Унија (ЕУ) во Брисел, Калас ги повика сите страни кои се инволвирани во ескалацијата на регионалните тензии да покажат воздржаност и да го почитуваат меѓународното право.
„Блискиот Исток ќе изгуби многу од која било долготрајна војна, а тоа важи и за нас во Европа, како и за целиот свет“, изјави таа.
„Токму затоа Европската Унија продолжува да ги повикува сите инволвирани страни да покажат максимална воздржаност, да ги заштитат цивилите и да го бранат и почитуваат меѓународното право“, додаде таа.
Калас изјави дека регионот влегува во нова фаза на неизвесност, со последната ескалација, додека нападите на САД и Израел врз Иран продолжуваат, предупредувајќи дека продолжувањето на конфликт може да ги продлабочи нестабилноста и да ја загрози хуманитарната состојба.
„Од пред 10 дена, ние сме во сосема нова ситуација во Блискиот Исток”, изјави таа, истакнувајќи дека траекторијата на тековната криза останува нејасна.
Таа, исто така, го обвини Иран за поттикнување на регионалната нестабилност, велејќи дека Техеран е со децении одговорен за насилството во регионот.
„Воените капацитети на Иран се ограничени, а режимот е послаб од кога било досега“, рече таа, нагласувајќи дека сѐ уште постои несигурност за тоа како може да се развива конфликтот.
Европската Унија веќе презеде чекори за одговор на ситуацијата, вклучително и активирање на својот механизам за цивилна заштита и организирање летови за евакуација на европските граѓани во регионот.
Калас истакна дека поморските операции на ЕУ исто така обезбедуваат заштита на трговските рути, додека блокот подготвува дополнителни иницијативи за зајакнување на регионалната безбедносна соработка.
Покрај Блискиот Исток, Калас предупреди дека ерозијата на меѓународното право сѐ повеќе ги обликува глобалните кризи, посочувајќи ја руската војна против Украина како уште еден пример.
Според неа, ЕУ од 2022 година обезбедила поддршка за Украина во вредност од 195 милијарди евра, што го прави блокот најголем поддржувач на Киев.
Таа посочи дека одбраната на меѓународното право останува централна точка на европската надворешна политика, предупредувајќи дека неуспехот во тоа може да доведе до понатамошна нестабилност низ светот.
