Muhammed Emin Canik
27 Октомври 2023•Ажурирај: 28 Октомври 2023
ИСТАНБУЛ (АА) - Во израелските напади врз Појасот Газа во изминатите три недели загинаа 7.326 Палестинци, пренесува Анадолу.
Само во изминатите 24 часа загинаа 298 лица.
Ашраф ал-Кудра, портпаролот на Министерството за здравство во Газа, рече дека бројот на загинати во Газа во израелските напади од 7 октомври се искачил на 7.326, од кои 3.038 се деца, 1.726 жени и 414 постари лица, а 18.967 луѓе се ранети.
Тој наведе дека Израел од вчера извршил 41 масакр.
Ал Кудра рече дека во Газа во последните 24 часа загинале уште 298 лица.
Тој наведе дека од 7 октомври израелската војска убила 5.500 луѓе од 772 семејства во Појасот Газа.
Ал Кудра истакна дека под урнатините по израелските напади има луѓе. Истакна дека 1.700 лица, од кои 940 деца, се водат за исчезнати.
Според него, израелските сили ги гаѓале и здравствените служби. Загинаа 104 здравствени работници, а 25 возила на Брзата помош се неупотребливи.
Наведувајќи дека Израел извршил напади врз 57 здравствени установи, Ал Кудра истакна дека 12 болници и 32 здравствени центри се надвор од функција поради нападите на израелската Армија или поради недостиг на гориво.
Порача дека постои итна потреба од медицинска помош во болниците и нагласи дека потребата за гориво во болниците и здравствените домови става во опасност од смрт илјадници пациенти и повредени.
Тој нагласи дека Израел го користи блокирањето на влезот на санитетски материјали и гориво во болниците како додатно оружје во своите напади врз Газа.
