Загинаа 25 Палестинци при превртување на камион со хуманитарна помош, 19 убиени од израелски истрели

ГАЗА/ИСТАНБУЛ (АА) - Најмалку 25 лица загинаа, а десетици се повредени при превртување на камион со хуманитарна помош врз толпа луѓе што чекаа испорака на помош, а денес израелската армија уби уште 19 Палестинци низ Појасот Газа, јавува Анадолу.

Државната новинска агенција Вафа соопшти дека фаталниот инцидент се случил откако израелската армија го принудила камионот да тргне по небезбеден пат во централниот дел на Газа.

Агенцијата не ја прецизираше точната локација на инцидентот.

Во меѓувреме, медицински извор изјави дека петмина Палестинци биле убиени од израелски оган додека чекале испорака на помош во близина на дистрибутивен пункт во западна Рафа во Јужна Газа.

Пет члена на едно семејство се убиени, а повеќе од 20 лица се повредени во напад на стан во бегалскиот камп Нусеират во централна Газа.

Во Газа е убиено шестмесечно бебе во израелскиот напад со беспилотно летало врз шатор во кој се сместени раселени семејства.

Израелски напади имало и врз две куќи во овој град, при што се убиени осуммина Палестинци, меѓу кои и деца.

Израел спроведува блокада на Газа 18 години, а од 2 март ги затвори сите гранични премини, сериозно ограничувајќи ја хуманитарната помош, со што уште повеќе се влошени тешките услови за 2,4 милиони жители во енклавата.

Според Канцеларијата за медиуми на Владата на Газа, Израел од 27 јули дозволил влез на само 843 камиони со хуманитарна помош - значително помалку од 6.000 камиони што се потребни за да се задоволат дневните потреби на жителите во текот на 10 дена.

Палестинските бројки покажуваат дека се убиени најмалку 1.568 лица што чекале да добијат помош, а 11.230 се повредени од израелски оган во близина на американските центри за дистрибуција на помош во Газа од 27 мај.

Властите во Газа ја обвинуваат израелската армија за „предизвикување хаос и глад“ во енклавата со тоа што намерно се воздржува од обезбедување на камионите со помош и ги принудува Палестинците да бараат помош на претходно бомбардирани и необновени патишта „преполни со гладни цивили“.

Шемата за помош, изготвена од Израел, е широко критикувана како „стапица за смрт“ за гладните цивили.

Отфрлајќи ги меѓународните повици за прекин на огнот, израелската армија уби над 60.400 Палестинци во Газа, повеќето од нив жени и деца, од октомври 2023 година. Воената кампања ја уништи енклавата, го разори здравствениот систем и доведе до смрт од глад.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид во Меѓународниот суд за правдата за неговата војна во енклавата.