Загинаа 4 војници при пад на воен хеликоптер во САД, објавија официјални лица

Четворица американски војници загинаа при пад на воен хеликоптер во средата за време на рутински тренинг лет во државата Вашингтон, соопшти Командата за специјални операции на американската Армија, пренесува Анадолу.

„Нашите срца се со семејствата, пријателите и колегите на загинатите“, изјави синоќа генерал-потполковник Џонатан Брага, командант на Командата за специјални операции на американската армија, објави ABC News.

Официјални лица информираа дека хеликоптер од типот MH-60 Black Hawk со четири лица се урнал во близина на заедничката база Луис-МекКорд околу 21 часот по локално време во среда.

Командата соопшти дека четворицата загинати војници биле дел од 160-тиот воздухопловен полк за специјални операции.

Властите соопштија дека операциите за спасување се во тек и дека имињата на четворицата војници нема да бидат објавени извесен период.

Хеликоптерот бил на рутински тренинг лет кога контролата на летање изгубила контакт со него, изјави портпарол на американската армија.