Здружение со седиште во Франција повика на бојкот на урмите од израелско потекло

АНКАРА (АА) - Здружението ЕвроПалестина, со седиште во Франција, повика на бојкот на урмите што се продаваат во земјата, а се произведуваат во нелегалните израелски населби на окупираниот Западен Брег, јавува Анадолу.

Здружението, кое се залага за правата на Палестинците, продолжи со повикот за бојкот на израелските производи за време на светиот муслимански месец Рамазан, кога потрошувачката на урми значително се зголемува.

Во разговор за Анадолу, претседателката на Здружението, Оливија Земор, рече дека голем дел од урмите со брендот Меџул што се продаваат во Франција „доаѓаат од нелегалните израелски населби или компании соучесници во окупацијата“.

Земор рече дека на некои кутии стојат Јордан или Мароко како земји на потекло, но тврди дека производите всушност се израелски.

Таа истакна дека како дел од кампањата за бојкот, некои волонтери спроведуваат активности за подигање на свеста во супермаркетите за да ги информираат потрошувачите, нагласувајќи дека нивната цел е да ја поттикнат потрошувачката на алтернативни производи.

Потсетувајќи дека според француските регулативи, продавачите се должни јасно да ја наведат земјата на потекло, особено за сувото овошје, Земор нагласи дека производите што потекнуваат од окупираните палестински територии не можат да бидат со етикета „Израел“.

Таа, исто така, рече дека бојкотирањето на овие производи има негативно влијание врз израелската економија, додавајќи дека некои мултинационални прехранбени компании се исто така меѓу „целите на бојкот“.