Alma Dekovic
24 Април 2022•Ажурирај: 25 Април 2022
КИЕВ (АА) - Претседателот на Украина, Владимир Зеленски, синоќа изјави дека официјален Киев ќе ги прекине мировните преговори со Москва доколку Русија ги убие бранителите на Мариупол и одржи „лажни референдуми“ за да создаде „лажни републики на окупираните подрачја“, пренесува Агенција Анадолија (АА).
Украинскиот претседател одржа конференција за медиумите во подземната железница во Киев и во таа прилика изјави дека ќе ги прекине преговорите со Москва доколку биде распишан референдум за независност во делумно окупираните јужни региони на Херсон и Запорожје.
„Доколку нашите луѓе бидат убиени во Мариупол, доколку распишат лажни референдуми во новите лажни републики, Украина нема да учествува во вакви преговарачки процеси“, рече Зеленски.
Украинскиот претседател се осврна и на ракетниот напад на руските сили на Одеса, на југот од земјата, во кој животот го загубија најмалку 6 лица, а 18 се повредени.
Како што информираше Зеленски, главниот пристаништен град на југот од Украина бил погоден од 7 проектили.
„Убија 3-месечно бебе. Војната започна кога ова бебе имаше еден месец. Можете ли воопшто да замислите што се случува?“, рече Зеленски.
На прашањето за посетата на американскиот министер за одбрана, Лојд Остин, и американскиот државен секретар, Ентони Блинкен, Зеленски рече „не треба да доаѓаат тука со празни раце“.
„Очекуваме конкретни нешта и конкретно оружје. Тоа е истото што им го зборував и на лидерите на другите земји... Апелираме до сите лидери дека тука е вистинска војна. Дојдете кај нас, но ве молам, донесете ни ја помошта за која разговаравме, која ја имате, која имате можност да ја донесете“, порача Зеленски.
