Mücahit Oktay
06 Мај 2022•Ажурирај: 08 Мај 2022
ЊУЈОРК (АА) - Компаниите сопственици на социјални мрежи не реагираат на 89 отсто од објавите што содржат антимуслиманска омраза и исламофобични содржини пријавени до нив, покажува најновиот извештај на Центарот за борба против дигиталната омраза, јавува Агенција Анадолија (АА).
„Овој извештај покажа дека компаниите сопственици на социјалните мрежи, вклучително Фејсбук, Инстаграм, ТикТок, Твитер и Јутјуб не успеаја да дејствуваат на 89 отсто од објавите што содржат антимуслиманска содржина пријавени до нив“, соопшти Центарот.
Во заедничко соопштение во 2019 година, Мета, Твитер и Гугл се обврзаа да го поддржат повикот на Крајстерч за елиминирање на терористичка и екстремистичка содржина на интернет.
Гигантите на социјалните мрежи изјавија дека ќе бидат одлучни во нивната „заложба да се осигураат дека прават сè што можат за да се борат против омразата и екстремизмот што води кон терористичко насилство“.
„Уште еднаш, нивните соопштенија за печатот се покажаа дека не содржат ништо повеќе од празни ветувања“, се вели во извештајот.
Истражувачите велат дека 530 објави содржат вознемирувачка и дехуманизирачка содржина која се однесува на муслиманите преку расистички карикатури, заговори и лажни тврдења.
Три објави се прегледани најмалку 25 милиони пати.
„Многу од навредливите содржини беа лесно препознатливи, а сепак, имаше неактивност“, се наведува во извештајот.
Истакнувајќи дека Инстаграм, ТикТок и Твитер им дозволуваат корисниците да користат хаштагови како #смртнаисламот #исламотерак #човексотурбан, во извештајот се вели дека содржината проширена со користење на овие хаштагови добила најмалку 1,3 милиони реакции.
Таквата содржина дополнително ги загрозува овие заедници со тоа што доведува до „социјални поделби, нормализирање на навредливото однесување и поттикнување офлајн напади и злоупотреба“, се додава.
„Уште полошо, платформите профитираат од оваа омраза, за нив омразата е добра работа“, се заклучува во извештајот.
