Израел: Закани кон челниците на партијата „Јамина“ по најавата дека ќе се придружат на блокот против Нетанјаху

АЛ КУДС (АА) - Израелските медиуми пишуваат дека е зголемен бројот на заканите кон лидерот на партијата „Јамина“, Нафтали Бенет, откако најави дека ќе се придружи на блокот против премиерот Бенјамин Нетанјаху за да формира коалициска Влада, пренесува Агенција Анадолија (АА).

Заканите се упатени и кон второто име на оваа партија, Ајелет Шакед, која е поранешна министерка за правда.

Бенет, кој се истакнува со своите екстремно десничарски ставови, во неделата на прес-конференција за медиумите изјави дека моментално не е возможно да се формира десничарска влада под водство на премиерот Нетанјаху.

Тој изјави дека постојат две можности пред Израел, дека треба или да излезат на петти избори или да формираат „влада на единство“ со партиите наречени „блок на промени“.

Тој најави дека ќе соработува со Јаир Лапид, челникот на партијата „Јехш Атид“ (Иднина), за да формира коалициска Влада.

Локалните медиуми наведуваат дека израелскиот Парламент одлучил дека ќе ги зголеми мерките за безбедност за Бенет и Шакед поради заканите.

Израелските медиуми претходно тврдеа дека, доколку се формира коалициска Влада со Бенет и Лапид, позицијата на премиерот ќе биде ротирачка и дека Бенет прв ќе ја преземе позицијата на која Бенјамин Нетанјаху е веќе 12 години.

По израелските избори на 23 март, претседателот Реувен Ривлин го именуваше Нетанјаху за мандатар за формирање коалициска Влада.

Нетанјаху не успеа да добие поддршка за формирање на Владата, па Ривлин на 5 мај му ја препушти таа обврска на противникот на Нетанјаху, Лапид.