Израел од 7 октомври приведе 24 палестински новинари на Западниот Брег

РАМАЛА (АА) - Синдикатот на палестински новинари денес соопшти дека израелските сили привеле уште тројца палестински новинари на окупираниот Западен Брег, со што бројот на приведени дописници од подрачјето од 7 октомври се искачи на 24, пренесува Анадолу.

Со овој потег вкупниот број новинари што се држат во израелските затвори се искачи на 39, се наведува во соопштението на Синдикатот на палестински новинари.

Тензиите низ Западниот Брег се зголемија откако избувнаа судири меѓу Израел и палестинската група Хамас по ненадејната нејзина прекугранична офанзива. Оттогаш на Западниот Брег загинаа најмалку 163 Палестинци, а 2.250 се повредени од страна на израелските сили, според официјалните податоци.

Израелските сили, исто така, приведоа уште 65 Палестинци на Западниот Брег, со што вкупниот број приведени Палестинци во последниот еден месец се искачи на 2.215, соопшти Здружението на палестински затвореници.

Пред последниов конфликт бројот на Палестинци приведени во израелските затвори беше околу 5.200, од кои повеќето беа притворени без обвинение или судење.