Израел ослободи 12 Палестинци, меѓу кои две жени, приведени во Газа

ГАЗА / ИСТАНБУЛ (АА) - Израелската Армија денес ослободи 12 палестински затвореници, меѓу кои и две жени, од Појасот Газа, изјавија очевидци, јавува Анадолу.

Ослободените затвореници се префрлени со возила на Меѓународниот комитет на Црвениот крст (МКЦК) во болницата „Ал Акса“ во градот Деир ал-Балах на медицински прегледи, додадоа тие.

Од Канцеларијата за медиуми на затворениците го потврдија ослободувањето на 12-те приведени, без да наведат детали за нивната здравствена состојба.

Над 9.500 Палестинци се затворени во израелските затвори, со голем број извештаи за тортура, глад и медицинско запоставување што доведе до смрт на затворениците.

Нема точни податоци за бројот на жители на Газа кои ги држи Израел, но проценките покажуваат дека нивниот број е илјадници.

Израелската Армија ја продолжи својата смртоносна офанзива на Појасот Газа на 18 март и оттогаш уби речиси 2.000 Палестинци, а рани над 5.200, прекршувајќи го договорот за прекин на огнот и размена на затвореници што стапи на сила во јануари.

Во ноември минатата година, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.