Израел тврди дека извршил атентат врз 11 ирански нуклеарни научници и напади врз стратегиски цели

АНКАРА (АА) - Израелската армија денес потврди дека 12-дневната кампања против Иран постигнала „целосна воздушна супериорност“ и нанела голема штета на нуклеарната и воената инфраструктура на Иран, јавува Анадолу.

Портпаролот на израелската армија Авичај Адрае изјави дека армијата „елиминирала 11 високи нуклеарни научници поврзани со иранската програма за нуклеарно оружје“ и извршила широки напади врз „стратегиски цели“ низ иранска територија.

Тој тврдеше дека армијата „ги нападнала сите три централни нуклеарни постројки“ во Иран и „уништила илјадници центрифуги“, како и „истражувачки и развојни центри поврзани со нуклеарната програма“.

Портпаролот на израелската армија тврди дека армиските сили уништиле 200 ракетни платформи што претставуваат „околу 50% од резервите на Иран“ и погодиле повеќе од 35 производствени погони за ракети и над 80 ракетни платформи земја-воздух.

Армијата, исто така, потврди дека „уништила 15 непријателски авиони“ и „нападнала шест непријателски аеродроми“.

Адрае тврдеше дека „стотици ирански воени лица биле убиени“, вклучително и „повеќе од 30 високи личности во иранскиот воен и безбедносен естаблишмент“.

Израелската армија, исто така, објави дека пресретнала „стотици ракети земја-земја со стапка на успех што надминува 86%“ и „стотици беспилотни летала со стапка на успех што надминува 99%.“

Овие тврдења не се независно потврдени и нема одговор од иранските официјални лица во врска со спецификите на соопштението на израелската војска.

Дванаесетдневниот конфликт меѓу Израел и Иран избувна на 13 јуни откако Израел започна воздушни напади врз ирански воени, нуклеарни и цивилни објекти, при што се убиени најмалку 606 лица, а 5.332 се повредени, според иранското Министерство за здравство.

Техеран започна одмазднички напади со ракети и беспилотни летала врз Израел, при што се убиени најмалку 29 лица, а ранети се повеќе од 3.400, според бројките објавени од Еврејскиот универзитет во Ерусалим.

Конфликтот беше запрен со прекин на огнот под покровителство на САД, кој стапи на сила на 24 јуни.