Mohammad Sio
28 Септември 2026•Ажурирано: 28 Септември 2026
Министерството за надворешни работи на Израел денес ја повика на разговор шпанската вршителка на должноста амбасадор во Тел Авив, Франсиска Педрос, поради изјавите на шпанската министерка за млади Сира Рего за поддршка на палестинска држава „од реката до морето“, пренесува Анадолу.
Потегот уследи откако Рего изјави дека шпанската јавност го поддржува воспоставувањето палестинска држава „од реката до морето“.
Израелското Министерство за надворешни работи ги оцени изјавите како дел од „систематската антиизраелска политика“ на шпанската Влада предводена од премиерот Педро Санчез, објави весникот „Једиот ахронот“.
Шпанската Влада веднаш не го коментираше потегот на Израел.
Рего ги даде изјавите во четвртокот, при претставувањето на палестинскиот амбасадор во Шпанија, Фади Елхусеини, на настан во Мадрид, објавија шпанските медиуми.
Таа рече дека Шпанија зазела „правилен став за конфликтот на Блискиот Исток“ и дека шпанската јавност поддржува „слободна Палестина од реката до морето“.
„Не ја избравме погрешната страна. Залагањето за човековите права и застанувањето на страната на палестинскиот народ е извор на длабока гордост за нас“, додаде таа.
Таа, исто така, го обвини израелскиот премиер Бенјамин Нетанјаху дека е „воен злосторник“ и го осуди израелското дејствување во Појасот Газа.
Односите меѓу Шпанија и Израел се затегнати поради осудата од Мадрид на израелската војна во Газа. Шпанија официјално ја призна државата Палестина во мај 2024 година.
Во април 2026 година, шпанскиот министер за надворешни работи Хозе Мануел Албарес повика ЕУ да преземе посилни мерки кон Израел, вклучително и преиспитување на односите со Тел Авив, прашувајќи што уште треба да се случи за блокот да одговори на израелските прекршувања на меѓународното право и човековите права.
Повеќе од 74.000 Палестинци се убиени, а над 175.000 се повредени во израелската воена операција во Газа од 2023 година. Офанзивата уништи и околу 90 % од инфраструктурата во енклавата.
И покрај прекинот на огнот што стапи во сила на 10 октомври 2025 година, израелската Армија продолжи со секојдневни напади во Газа, при што убиени се над 1.400 Палестинци, а околу 5.000 се повредени, според Министерството за здравство на Газа.
