Mohammad Sıo
22 Февруари 2024•Ажурирај: 24 Февруари 2024
АЛ-КУДС/ЕРУСАЛИМ (АА) - Израелската министерка за социјална еднаквост Меј Голан изјави дека е „горда“ на разорувањето што го предизвикала израелската армија во Појасот Газа, јавува Анадолу.
Говорејќи за време на седницата на Кнесетот, израелскиот Парламент, синоќа Голан му се закани на лидерот на Хамас во Газа, Јахја Синвар, со обезглавување или апсење.
„Не се срамиме да кажеме дека сакаме да видиме како војниците на ИДФ (израелската армија) ги фаќаат Синвар и неговите терористи за очи и ги влечат преку Појасот Газа на пат кон занданите на затворската управа“, рече таа.
Таа нагласи:
„Јас лично сум горда на урнатините во Газа и дека секое бебе, дури и 80 години отсега, ќе им кажува на своите внуци што правеле Евреите. Без гулаб и без маслиново гранче, само меч да му ја отсечат главата на Синвар, тоа ќе го добие од нас.“
Во израелските напади врз Појасот Газа од 7 октомври загинати се 29.410 Палестинци.
По обвинението за геноцид што го поднесе Јужноафриканската Република, Меѓународниот суд на правдата на 26 јануари пресуди дека Израел мора да се воздржи од какви било активности поврзани со убивање, напади и уништување на жителите на Газа и да ги преземе сите мерки за да спречи геноцид.
Според податоците на Обединетите нации, поради израелските напади, 85 отсто од населението на Појасот Газа е внатрешно раселено и се соочува со акутен недостиг на храна, чиста вода и лекарства, а околу 60 отсто од инфраструктурата во Појасот Газа е оштетена или уништена.
