Lina Altawell
11 Август 2026•Ажурирано: 11 Август 2026
По помалку од три недели откако Палестинецот Фарук Рамадан беше убиен додека се спротивставуваше на израелски доселеници, израелската Армија го урна неговиот дом во градот Тал на окупираниот Западен Брег, јавува Анадолу.
Рамадан беше меѓу четворицата Палестинци кои беа убиени, а четворица други беа повредени за време на нападот на израелските сили и доселеници врз Тал кон крајот на јули, според локални извори.
Рамадан, кој бил невооружен, одзел оружје од еден доселеник додека се спротивставувал на нападот врз селото југозападно од Наблус. Потоа отворил оган врз доселениците и израелските сили, при што убил двајца, според истите извори.
Израелската Армија го урна третиот кат од станбената зграда во Тал, откако извршила рација во областа и ги принудила жителите на неколку околни домови да се евакуираат пред уривањето, јави дописникот на Анадолу.
Одделно, израелската Армија започна со уривање на околу 20 палестински продавници и домови во селото Анза, јужно од Џенин во северниот дел на Западниот Брег, наводно поради изградба без дозволи, според локален активист и дописникот на Анадолу.
Тајсир Садака, активист кој ги документира израелските прекршувања во Анза, изјави дека Армијата извршила упад во селото со возила за уривање и започнала да урива околу 20 продавници лоцирани на главниот пат што го поврзува селото со Џенин.
„Уривањата се вршат под изговор дека објектите се изградени без дозвола“, изјави Садака за Анадолу.
Уривањата се случуваат во услови на засилено уништување на палестински домови и други објекти низ окупираниот Западен Брег, паралелно со проширувањето на нелегалните населби и воспоставувањето нови населби, според палестински извори.
Од почетокот на израелската војна во Газа на 8 октомври 2023 година, израелските сили и доселениците ги засилија нападите на Западниот Брег, при што се убиени повеќе од 1.183 Палестинци, околу 13.000 се повредени, а речиси 25.000 се приведени, според палестински податоци.
Палестинците предупредуваат дека ескалацијата е дел од израелските напори за создавање факти на терен, со што се отвора патот кон анексија на окупираниот Западен Брег и се нарушува можноста за формирање палестинска држава во границите од 1967 година, во согласност со релевантните резолуции на ОН.
