Lina Altawell
13 Август 2026•Ажурирано: 13 Август 2026
Израелската Армија денес изврши воздушни напади и детонираше и запали домови во јужен Либан, продолжувајќи со прекршувањата на договорот за прекин на огнот, објави Националната новинска агенција на Либан, јавува Анадолу.
Израелските сили извршија офанзиви со детонирање и палење домови во градовите Маџдал Зун и Ал-Мансури во Јужната Губернија, како и во блиските долини, објави агенцијата.
Израелските авиони во текот на ноќта во два наврати го гаѓале и Ал-Мансури, при што експлозии биле слушнати во градот Тир, се додава.
Либанскиот премиер Наваф Салам синоќа ги отфрли израелските оправдувања за уништувањето села и градови, велејќи дека сметањето на цели села за воени објекти на Хезболах нема никаква логика и претставува сериозно прекршување на принципите и правилата на меѓународното право.
Салам рече дека Израел извршува напади, упади, операции со булдожери и уништување на домови, станбени населби, инфраструктура, владини објекти и верски објекти.
Либанската Армија вчера исто така соопшти дека континуираните израелски напади врз југот го попречуваат завршувањето на нејзиното распоредување и враќањето на жителите, посочувајќи дека израелските сили разнеле цивилни објекти и домови во Источен Завтар во провинцијата Набатије.
И покрај потпишувањето на рамковниот договор меѓу Бејрут и Тел Авив на 26 јуни со посредство на САД, Израел продолжува со нападите врз Либан, кои започнаа на 2 март и во кои загинаа 4.335 лица, а 12.277 се повредени.
Договорот предвидува постепено израелско повлекување од целата окупирана либанска територија во замена за распоредување на либанската Армија таму, како и разоружување на вооружените групи, што се однесува на Хезболах.
Израел окупира области во јужен Либан, некои со децении, а други од претходната војна меѓу 2023 и 2024 година, додека за време на сегашната офанзива навлегол повеќе од 10 километри во либанска територија.
