Израелските воздушни напади врз јужен Либан продолжуваат, уништена историска џамија

АНКАРА (АА) - Во серија воздушни напади извршени пред зори денес, израелски воени авиони гаѓаа повеќе локации во јужен Либан, предизвикувајќи значителна деструкција, јави Либанската национална новинска агенција, пренесува Анадолу.

Околу 03:45 часот, во воздушен напад срамнета е историската стара џамија во центарот на градот Кфар Тибнит, целосно уништувајќи ја, пренесе агенцијата.

Претходно, околу 12:15 часот, во друг воздушен напад гаѓана е трикатна зграда до станицата Габрис на автопатот Зефта-Набатиех, исто така уништувајќи ја, се додава.

Нападот предизвикал затворање на патот бидејќи остатоците од уништената зграда го блокирале пристапот. Истата зграда една недела претходно беше погодена во воздушен напад во кој делумно беше оштетена.

Третиот воздушен напад беше извршен во приближно 01:30 часот, овој пат врз градот Аита ал Шааб. Не се достапни дополнителни детали за евентуални жртви или материјална штета.

Израел од 23 септември врши масовни воздушни напади низ Либан врз, како што тврди, позиции на Хезболах, при што загинаа најмалку 1.437 луѓе, повредени се над 4.123, додека раселени се повеќе од 1,34 милиони луѓе.

Воздушната кампања е ескалација на едногодишната прекугранична војна меѓу Израел и Хезболах од почетокот на неговата офанзива врз Појасот Газа, во која Израел уби речиси 42.200 Палестинци, повеќето жени и деца, по нападот на Хамас минатата година.

И покрај меѓународните предупредувања дека Блискиот Исток е на работ на регионална војна поради немилосрдните напади на Израел врз Газа и Либан, тој го прошири конфликтот на 1 октомври со започнување копнен упад во јужен Либан.