Израелските сили извршија рација во град во јужна Сирија и приведоа млад човек

Израелските сили денес извршија рација во град во јужна Сирија и приведоа млад човек откако го застрелале во стапалото, објави сириската официјална новинска агенција САНА, пренесува Анадолу.

Според САНА, израелските сили влегле во Џабата ал-Хашаб, во северниот дел на провинцијата Кунејтра, и го привеле младиот човек откако бил ранет во стапалото од огнено оружје.

Засега нема дополнителни информации за околностите на рацијата или за состојбата на приведениот маж.

Рацијата се случи по два дена откако израелската Армија уби маж во јужна Сирија, тврдејќи дека се обидел да влезе во воен пункт во „безбедносна зона“.

Израел ги прошири своите воени операции во Сирија по падот на режимот на Башар ал-Асад на 8 декември 2024 година, при што неговите сили навлегоа во демилитаризираната тампон-зона на окупираната Голанска Висорамнина и во околните позиции.

Сирија побара Израел да се повлече од териториите што ги окупираше и ја потврди својата посветеност на Договорот за раздвојување на силите од 1974 година. Израел наведува дека неговите дејствија се мотивирани од безбедносни причини.