СЗО предупредува дека ескалацијата на конфликтот во Јемен има „разорни последици“

Генералниот директор на Светската здравствена организација (СЗО), Тедрос Аданом Гебрејесус, предупреди дека ескалацијата на конфликтот во Јемен има „разорни последици“, јавува Анадолу.

„Ескалацијата на конфликтот во Јемен има разорни последици. Речиси 1.000 лица се убиени, повеќе од 4.200 се повредени, а речиси 198.000 се раселени од почетокот на најновата ескалација, во услови на појава на колера и мали сипаници“, рече Тедрос.

Тој на американската платформа за социјални медиуми X наведе дека итните финансиски потреби на СЗО повеќе од тројно се зголемиле – од 9 милиони на 31 милион долари – поради зголемените потреби.

„Итно ги повикуваме донаторите да ги зголемат своите придонеси. Од хуманитарната и здравствената помош зависат животи“, додаде Тедрос.

Јемен е зафатен од конфликт откако Хусите ја презедоа контролата врз главниот град Сана и неколку провинции во септември 2014 година, што во март 2015 година ја поттикна интервенцијата на коалицијата предводена од Саудиска Арабија во поддршка на меѓународно признатата Влада.

Судирите меѓу владините сили и Хусите повторно започнаа во јули, што беа најинтензивните борби по периодот на релативно затишје што следуваше по прекинот на огнот постигнат со посредство на ОН, а кој започна во април 2022 година.

Борбите се интензивираа во септември, кога Хусите ја презедоа контролата врз клучните подрачја во провинциите Худајда и Таиз, вклучително и стратегискиот град Мока и островот Мајун, кој се наоѓа со поглед кон теснецот Баб ел-Мандеб.