Иранскиот Парламент одобри затворање на Ормутскиот Теснец по американските напади врз нуклеарните постројки

ИСТАНБУЛ (АА) – Иранскиот Парламент одобри затворање на Ормутскиот Теснец за поморски сообраќај по американските напади врз три нуклеарни објекти, соопшти денес ирански пратеник, јавува Анадолу.

„Парламентот донесе заклучок дека Ормутскиот Теснец треба да се затвори“, изјави генерал-мајор Есмаил Ковсари, член на Комисијата за национална безбедност на Парламентот, во изјава објавена од државната Прес ТВ.

Ормутскиот Теснец се смета за најважната порта во светот за транспорт на нафта.

„Конечната одлука во овој поглед е на Врховниот совет за национална безбедност“, додаде Ковсари.

Врховниот совет за национална безбедност претставува највисок безбедносен орган на Иран.

Претседателот на САД, Доналд Трамп, рано утрово изјави дека неговите сили бомбардирале три ирански нуклеарни објекти во Фордо, Натанц и Исфахан.

Нападите се најнова ескалација во израелскиот воен напад поддржан од САД врз Иран од 13 јуни, што го натера Техеран да започне одмазднички напади врз Израел.

Израелските власти соопштија дека најмалку 25 лица се убиени, а стотици се повредени оттогаш во иранските ракетни напади.

Во Иран, 430 лица се убиени, а над 3.500 се ранети во израелските напади, според иранското Министерство за здравство.