Катар, Турција и Владата на талибанците се договорија за клучни прашања за управувањето со аеродромот во Кабул

ДОХА (АА) - Катар, Турција и привремената Влада во Авганистан предводена од талибанците се договорија за „неколку клучни прашања“ за управување со аеродромот во авганистанската престолнина Кабул, јавува Агенција Анадолија (АА).

„Делегациите на државата Катар, Република Турција и авганистанската привремена Влада вчера во Доха го завршија трипартитниот состанок за управување и функционирање на меѓународниот аеродром во Кабул“, се вели во соопштението на катарското Министерство за надворешни работи.

„Тие се договорија за неколку клучни прашања за тоа како да управуваат со аеродромот“, додаде Министерството.

Министерството соопшти дека средбата во Доха била продолжение на претходните разговори, чија последна рунда се одржа во Кабул минатата недела.

„Последната рунда преговори ќе се одржи следната недела“, се додава.

Летовите беа суспендирани на главниот меѓународен аеродром во Авганистан во Кабул, откако талибанците ја презедоа власта минатиот август, а американските трупи уништија опрема и радарски систем во објектот пред да ја напуштат земјата.

Кон крајот на декември 2021 година, дипломатски извори за АА изјавија дека Турција и Катар се договориле заеднички да управуваат со меѓународниот аеродром во Кабул во Авганистан.

По разговорите меѓу комитетите од двете земји, беше потпишан меморандум за разбирање меѓу турските и катарските компании за соработка со аеродромот врз основа на еднакво партнерство.