Катар ја поздрави осудата на СБОН за израелскиот напад врз делегацијата на Хамас во Доха

АНКАРА (АА) – Катар денес ја поздрави осудата на Советот за безбедност на Обединетите нации (СБОН) за израелскиот напад врз делегацијата на Хамас во главниот град Доха, нарекувајќи го нападот „предавнички“ и кршење на меѓународните норми, пренесува Анадолу.

„Катар ја поздравува осудата на Советот за безбедност на предавничкиот израелски напад врз делегацијата на Хамас, што го поткопува меѓународниот поредок, како што му нагласив на Советот“, истакна катарскиот премиер, шеикот Мухамед бин Абдулрахман бин Јасим ал-Тани, во објава на американската компанија за социјални медиуми X.

Тој нагласи дека Доха е посветена на својата „хуманитарна и дипломатска улога и правото да го заштити нашиот суверенитет и безбедност“.

Членовите на Советот за безбедност на ОН вчера го осудија израелскиот напад врз Катар.

Израелските воени авиони во вторникот извршија воздушен напад врз раководството на Хамас во главниот град на Катар. Во нападот беа убиени петмина членови на Хамас и еден припадник на безбедносните сили на Катар.

Катарскиот премиер треба да се сретне со американскиот претседател Доналд Трамп подоцна во текот на денот, заедно со неколку високи американски претставници, за да разговараат за израелскиот напад врз Катар и статусот на разговорите за прекин на огнот во Газа, која е под интензивирани израелски напади.