Кремљ: Важно е американскиот пратеник за Украина да продолжи со напорите за медијација

ИСТАНБУЛ (АА) - Кремљ денес соопшти дека е „важно“ американскиот специјален пратеник за Украина, Кит Келог, да ги продолжи напорите за медијација меѓу Москва и Киев за време на неговата посета на украинската престолнина, јавува Анадолу.

„За нас е многу важно г. Келог, како претставник на тимот на претседателот на САД, Доналд Трамп, да продолжи со напорите за обезбедување медијација во рамките на решавањето на руско-украинскиот конфликт“, изјави портпаролот на Кремљ, Дмитриј Песков, на прес-конференција.

Иако нагласи дека Русија нема конкретни очекувања од посетата на Келог, Песков повтори дека таа останува подготвена за трет круг директни мировни преговори со Украина.

„Очигледно е дека Киев не брза. Сè уште чекаме предлози од украинска страна за тајмингот“, додаде тој.

Реагирајќи на најавата на Трамп дека САД ќе пратат неутврден број системи за противвоздушна одбрана „Патриот“ во Украина, Песков изјави дека Москва тргнува од фактот дека американската воена поддршка за Украина „продолжува и натаму“.

Денес Келог пристигна во Киев во еднонеделна посета, каде што беше пречекан од шефот на украинската претседателска канцеларија, Андриј Јермак.

Јермак објави на Телеграм дека постојат „многу теми за дискусија“, наведувајќи дека на агендата се прашања поврзани со одбраната, зајакнувањето на безбедноста, оружје, санкции, заштита на украинските граѓани, како и продлабочување на соработката меѓу Украина и САД.

Првите два круга директни преговори меѓу Русија и Украина - први по повеќе од три години - се одржаа во мај и јуни во Истанбул, Турција.