Министерство за здравство на Газа: Израел користи невообичаено оружје кое предизвикува тешки изгореници

ГАЗА (АА) - Израел користи „невообичаено оружје“ што предизвикува тешки изгореници на телата на жртвите, соопшти вчера Министерството за здравство на Газа, јавува Анадолу.

Портпаролот на Министерството, Ашраф ал Кудра, истакна дека „медицинскиот персонал увиде употреба на невообичаено оружје што предизвикува тешки изгореници на телата на загинатите и ранетите.“

Израел засега не ги коментираше изјавите.

Ал-Кудра во посебна објава предупреди на „сериозни компликации“ кои би можеле да ги однесат животите на над 1.000 пациенти со бубрежна инсуфициенција доколку резервите со гориво не се стават на располагање на болниците и здравствениот сектор.

„Неуспехот да се користи гориво во болниците ќе предизвика сериозни компликации што ќе резултираат со животи на 1.100 пациенти со бубрежна инсуфициенција, меѓу кои 38 деца“, рече Ал-Кудра.

Тој ги повика граѓаните кои „имаат било колкава количина на дизел итно да го донираат гориво во болниците за да ги спасат животите на ранетите и болните“.

Израелската армија продолжува да ја таргетира Газа со интензивни воздушни напади кои уништија цели населби, при што загинаа 4.651 Палестинци, вклучувајќи 1.873 деца и 1.023 жени, а повредени се 14.245, според Министерството за здравство на Газа.

Под урнатините се заробени и неутврден број луѓе.

Конфликтот во Газа, која е под израелско бомбардирање и опсада од 7 октомври, започна кога Хамас ја почна операцијата „Поплава Ал Акса“, ненадеен напад со низа лансирања на ракети и инфилтрирање во Израел преку копно, море и воздух. Хамас наведе дека операцијата е одмазда за упадите во џамијата „Ал Акса“ и зголеменото насилство од страна на еврејските доселеници врз Палестинците.

Израелската војска потоа ја започна операцијата „Железни мечеви“ против позиции на Хамас во Појасот Газа.

Во конфликтот загинаа над 1.400 Израелци.