Мицотакис најави предвремени избори во Грција на 21 мај

АТИНА (АА) – Грција ќе одржи предвремени парламентарни избори на 21 мај, соопшти грчкиот премиер Кирјакос Мицотакис, јавува Анадолу.

Доколку не се обезбеди јасно мнозинство во првиот круг од изборите, вториот круг ќе се одржи до почетокот на јули, рече Мицотакис во воведниот говор на неделната средба на Кабинетот.

Мицотакис истакна дека Владата има должност да ги разоткрие грешките на сегашниот простопропорционален изборен систем, за кој рече дека има тенденција да создаде нестабилност.

„Првото гласање ќе одреди кој ќе владее, додека вториот круг ќе одреди како ќе владее“, рече Мицотакис, и додаде дека на Грција ѝ треба силно лидерство во овој „исклучително нестабилен свет“. „Затоа, граѓаните треба да знаат кого го гласаат за премиер“, нагласи тој.

Мицотакис ги повика граѓаните да гласаат за неговата конзервативна партија Неа Димократија (НД) за формирање еднопартиска Влада.

„Грците на изборите на 21 мај ќе изберат дали земјата ќе продолжи да го освојува и добива облогот на модернизацијата“, додаде тој.

Алексис Ципрас, лидерот на главната левичарска опозиција СИРИЗА-ПС, вчера повтори дека се залага за коалиција на левичарски партии предводени од СИРИЗА за „регенерација и повторна изградба“ на земјата.

Тој, сепак, отфрли сценарио за голема коалиција со владејачката партија Неа. „Каков вид договор за програма може да постигне партија која го формира јадрото на неолибералното гледиште со партии кои себеси се нарекуваат прогресивни“, рече Ципрас.