На првата годишнина од падот на Асад, претседателот Шара вети „силна Сирија достојна за своето минато и сегашност“

ИСТАНБУЛ (АА) – Сирискиот претседател Ахмад ал-Шара денес порача дека земјата влегува во нова фаза на обнова достојна за нејзиното минато и сегашност, одбележувајќи ја првата годишнина од падот на режимот на Башар ал-Асад, објави сириската арапска новинска агенција (САНА), известува Анадолу.

Во говорот по извршувањето на утринската молитва во џамијата Умајад во Дамаск, претседателот Шара, облечен во воена униформа, им се обрати на граѓаните со зборовите:

„Никој, колку и да е голем, нема да ни застане на патот. Ниту една пречка нема да нè сопре, и заедно ќе се соочиме со секој предизвик, ако даде Бог.“

„Од север до југ, и од исток до запад, ако даде Бог, ќе ја изградиме Сирија повторно силна, со обновување достојно за нејзината сегашност и нејзиното минато – обновување достојно за древното наследство на Сирија,“ додаде тој.

Претседателот истакна дека следната фаза ќе биде заснована на „поддршка на ранливите и обезбедување правда меѓу луѓето“.

Според САНА, Шара поставил дел од ткаенината на Ќаба – подарок од саудискиот престолонаследник Мохамед бин Салман – во внатрешноста на џамијата Умајад во Дамаск.

Асад, кој владееше со Сирија речиси 25 години, избега во Русија во декември минатата година, со што заврши владеењето на партијата Баас, која беше на власт од 1963 година. Новата транзициска администрација на Шара беше формирана во јануари.