Над 110.000 луѓе во Белгија со години живеат без документи

БРИСЕЛ (АА) - Бројот на луѓе во Белгија без дозвола за престој или работа, кои живеат таму со години, изнесува околу 112.000, пренесува Анадолу.

Според локалните медиуми, истражувачите Пјетер-Пол Верхаге и Силвие Гадајне од Слободниот универзитет во Брисел (VUB) го пресметале бројот на „луѓе без документи“ во земјата користејќи алтернативен метод.

Поаѓајќи од смртта на околу 500 луѓе годишно, кои не се вклучени во регистарот на население во земјата, истражувачите, исклучувајќи го бројот на туристи и бегалци со дозволи за престој, заклучија дека бројот на луѓе „без документи“ во Белгија, која има население од околу 11,5 милиони жители, изнесува 112.000.

Оваа бројка одговара на населението на популарниот туристички град во земјата, Бруж.

Од нив 52.000 живеат во главниот град Брисел.

Таканаречените „луѓе без документи“ во Белгија се оние што дошле во земјата пред неколку години на различен начин од Алжир, Тунис, Авганистан, Пакистан и многу африкански земји, но немаат документи.

На повеќето од овие луѓе, кои живеат во земјата без дозвола за престој или работа, одбиени им се барањата за престој.

„Луѓето без документи“ одвреме-навреме организираат штрајкови, но Белгија не наоѓа трајно решение за ова прашање.