Иранската делегација пристигна во Ријад за повторно да ја отвори Амбасадата

АНКАРА (АА) - Иранската техничка делегација пристигна во Саудиска Арабија за повторно отворање на Амбасадата на Техеран во Ријад, објавија официјалните медиуми на Иран, пренесува Анадолу.

Според новинската агенција ИРНА, делегацијата подоцна ќе отпатува за Џеда за да изврши увид во канцеларијата на Конзулатот и иранската мисија во Организацијата за исламска соработка (ОИС).

Саудиската делегација го посети Техеран во саботата за да разговара за повторното отворање на амбасадите како дел од разговорите организирани од Кина за повторно воспоставување дипломатски односи меѓу двете земји, кои беа прекинати во 2016 година.

Саудиска Арабија и Иран на 10 март најавија повторно воспоставување на нивните дипломатски односи и повторно отворање на амбасадите во рок од два месеца.

Во јануари 2016 година Саудиска Арабија ги прекина дипломатските односи со Иран по нападите врз нејзината Амбасада во Техеран и Конзулатот во Машхад, за време на протестите против егзекуцијата на саудискиот шиитски свештеник Нимр ал-Нимр.