Beyza Binnur Dönmez
26 Ноември 2025•Ажурирај: 28 Ноември 2025
ЖЕНЕВА (АА) - Епидемијата на колера погоди повеќе од половина милион луѓе оваа година, според најновиот извештај за надворешната состојба на Светската здравствена организација (СЗО), кој покажува значајни, но нееднакви трендови низ регионите, јавува Анадолу.
Од 1 јануари до 26 октомври годинава, во 32 земји во пет региони на СЗО биле регистрирани вкупно 565.404 случаи на колера и 7.074 смртни случаи, се наведува во извештајот.
Најголем број заболени е забележан во Регионот на Источниот Медитеран, а по него следуваат Африканскиот Регион, Регионот на Југоисточна Азија, Јужна и Северна Америка и Западен Пацифик. Во Европскиот Регион не се пријавени случаи во овој период.
Извештајот покажува и значително подобрување на глобалната состојба во октомври. Во текот на месецот биле регистрирани 35.026 нови случаи на колера и акутна водена дијареја (AWD) во 20 земји од четири региони, што претставува намалување од 34 % во однос на септември.
Смртните случаи исто така забележале остар пад, 335 починати во октомври, што е 55 % помалку од претходниот месец.
СЗО посочува дека глобалната достапност на орални вакцини против колера (OCV) е подобрена. Во октомври 2025 година, светската залиха изнесувала 7,9 милиони дози, надминувајќи го итниот праг од пет милиони што организацијата го смета за минимум за брза реакција.
Сепак, напорите за справување со епидемијата остануваат сериозно оптоварени поради недостаток на инфраструктура за вода, санитарии и хигиена (WASH), ограничени количества вакцини, недоволна надзорна покриеност, како и влијанието на конфликтите и природните катастрофи.
Со оглед на тоа што националните капацитети се преоптоварени, а финансиските јазови се продлабочуваат, СЗО и партнерите предупредуваат дека ќе бидат неопходни засилена координација, поголеми инвестиции и подобра прекугранична соработка за да се намали преносот и да се поддржат најпогодените земји во наредните месеци.
