Најмалку 15 мртви, 28 исчезнати откако потона ферибот со над 300 патници во јужниот дел на Филипини

ИСТАНБУЛ/КАРАЧИ (АА) – Најмалку 15 лица загинаа, а 28 се водат како исчезнати откако ферибот со повеќе од 300 патници потона во раните утрински часови денес во јужниот дел на Филипини, јавува Анадолу.

Според локалниот англиски дневен весник „Филстар“, уште 28 лица се водат како исчезнати.

Бродот, идентификуван како M/V „Триша Керстин 3“, се движел кон островот Џоло во покраината Сулу.

Претставници на крајбрежната стража на Филипини (PCG) соопштија дека 316 лица се спасени, а во тек се операции за пребарување и спасување поддржани од воени бродови и хеликоптери.

Бродот пратил сигнал за помош околу 1:50 часот по локално време, околу четири часа по испловувањето од пристаништето во градот Замбоанга, на југозападниот дел на островот Минданао.

Првичните извештаи покажуваат дека на бродот имало повеќе од 330 патници и 27 члена на екипажот во моментот на несреќата.

Снимките објавени од крајбрежната стража прикажуваат како преживеаните се извлекуваат од морето и добиваат медицинска помош, додека во заднина може да се слушнат повици за помош во темнината.

Надлежните власти наредија спроведување истрага за поморската несреќа, со цел да се утврдат причините за потонувањето. Засега не е забележано истекување на нафта од пловилото.

Филипини, кои се состојат од околу 7.000 острови, имаат долга историја на смртоносни поморски несреќи, често поврзани со слаба регулација и користење евтини и небезбедни пловила.