Нетанјаху: Пристаништето Худејда во Јемен, кое Израел го нападна, се користи за снабдување на Хусите со иранско оружје

ИСТАНБУЛ (АА) - Премиерот на Израел синоќа изјави дека пристаништето Ал Худејда во западен Јемен се користело за снабдување на Хусите со иранско оружје, пренесува Анадолу.

„Пристаништето што го нападнавме не е невино. Се користеше за воени цели и како влезна точка за смртоносно оружје што им се дава на Хусите преку Иран“, рече Нетанјаху, објави израелскиот дневен весник Једиот Ахронот. „Имам порака до непријателите на Израел: Не не потценувајте. Ќе се браниме на секој фронт и на секој начин“.

Каналот Ал-Масира, поврзан со Хусите, претходно објави дека има жртви од израелските воздушни напади врз пристаништето Ал Худејда.

Нападите беа насочени кон капацитетите за складирање нафта во пристаништето, како и електраната во гувернатот.

Тоа беше првиот директен израелски одговор на неодамнешните напади на Хусите.

Израелските воздушни напади уследија по нападот со дрон на Хусите врз Тел Авив во петокот наутро, во кој загина еден Израелец, а повредени беа девет други.

Хусите ги напаѓаат бродовите што се во израелска сопственост, пловат под израелско знаме, управувани се или пловат кон израелските пристаништа во Црвеното Море и Аденскиот Залив со проектили и дронови во знак на солидарност со Газа, која е под разорен израелски напад од 7 октомври.